PROPOSTAS DE VIGOHISTÓRICO SOBRE O FUTURO DO TEATRO CINE FRAGA
En resposta á amable invitación recibida, desde Vigohistórico desexamos facer chegar as nosas suxestións en relación aos posibles usos futuros do Teatro Cinema Fraga.
A idea principal e unánime é unha rotunda negativa a converter o Teatro Fraga noutro “contedor” de eventos diversos sen máis, baleiro de alma e participación. Pola contra, sería desexable recuperar o Teatro Fraga para a cidadanía viguesa, como o espazo central da (hoxe
concisa) actividade cultural en Vigo.
En esencia propoñemos que o Teatro configúrese como un espazo de expresión e desenvolvemento das Artes Escénicas, con total apertura de miras e seguindo exemplos como o Teatro Rívoli do Porto, o Teatro Central de Sevilla ou La Casa Encendida de Madrid. Por
suposto, sen renunciar á programación de espectáculos externos, pero tamén como xerme e escaparate da creación local.
Para ese fin, e cun carácter inicial, podería suxerirse a xeración de:
- Un espazo de fomento da creación local en calquera ámbito das artes escénicas: teatro, música, ópera e danza;
- Un espazo de reflexión e estudo, quizá a través da invitación de artistas ou entidades sobresalientes do sector;
- Un espazo de creación e colaboración con outras entidades (conservatorio, ESAD, EMAO, Escola Municipal de Teatro etc.)/ etc.);
- Un espazo de fomento doutras actividades vinculadas á escena: decorados, atrezo, maquillaxe, vestiario etc.;
- Un espazo de ensaio de agrupacións musicais, grupos de teatro etc.; coa posibilidade de convertelo en sede dalgunha delas;
- Un espazo de encontro e colaboración interxeracional, para os amantes das artes escénicas;
- Un espazo para situar a sede sur da Filmoteca de Galicia, aproveitando a excepcional acústica da sala principal para a proxección de películas, con música en directo cando fose posible;
- Un espazo, como se ve, de interacción e procura de sinerxias entre cidadanía, artistas e entidades.
Para a consecución de tan amplos e ambiciosos obxectivos, entendemos necesario o nomeamento dun comité profesional que sente as bases da súa xestión e programación, buscando a permanencia e continuidade no tempo. E, quizá, un xurado que seleccione unha
persoa directora. Nesta liña, calquera suxestión de organización (fundación, etc.) que permita afastar a vida do Teatro Fraga de avatares políticos redundará na súa consolidación como espazo de referencia das artes no sur de Galicia.
En Vigo, a 19 de Setembro de 2024
PD. Xa por último, dúas peticións menores. Unha, a recuperación (e homenaxe) aos carteis (e cartelistas) que decoraban a fachada do Teatro Cinema Fraga. E tamén un recordo a D. Isaac Fraga e D. Cesáreo González, quizá na denominación das salas principais do Teatro.
